जळगाव जिल्ह्याच्या रिद्धी काळेची राज्यस्तरीय बास्केटबॉल स्पर्धेसाठी निवड
पाचोरा: पाचोरा उपविभागीय अधिकारी कार्यालयाचे पोलीस कर्मचारी श्री. गजेंद्र काळे यांची कन्या, रिद्धी काळे, हिची जळगाव जिल्ह्यातून राज्यस्तरीय बास्केटबॉल स्पर्धेसाठी निवड झाली आहे. ती आता सोलापूर येथे होणाऱ्या १३ वर्षांखालील राज्यस्तरीय बास्केटबॉल स्पर्धेत जिल्ह्याचे प्रतिनिधित्व करणार आहे.
पाचवीत शिकणारी रिद्धी बास्केटबॉलच्या खेळावर विशेष प्रेम करते. स्थानिक स्तरावर उत्तम कामगिरी करत तिने आपले कौशल्य सिद्ध केले असून, आता तिच्या या यशाने तिला राज्यस्तरावर पोहोचवले आहे. आपल्या मुलीच्या या कामगिरीने वडील गजेंद्र काळे यांना विशेष आनंद झाला आहे. “मुलगी म्हणजे घराचे खरे सुख आणि आनंदाचा खजिना. रिद्धीने तिच्या लहान वयातच खेळाच्या मैदानावर स्वतःची वेगळी ओळख निर्माण केली आहे,” असे ते अभिमानाने म्हणाले.
रिद्धीच्या या निवडीमुळे तिचे कुटुंब, मित्रपरिवार आणि पाचोरा शहरातून तिच्यावर अभिनंदनाचा वर्षाव होत आहे. तिच्या यशस्वी वाटचालीस सर्वत्र शुभेच्छा दिल्या जात आहेत.
