पाचोरा तालुक्यात तापमान ४५ अंश सेल्सिअस पार;नागरिकांना काळजी घेण्याचे आवाहन
मधुर खान्देश वृत्तसेवा: पाचोरा (जळगाव), दि. २९ एप्रिल २०२५: जळगाव जिल्ह्यातील पाचोरा तालुक्यात सध्या तीव्र उष्णतेची लाट पसरली असून तापमान ४५ अंश सेल्सिअसच्या पार गेले आहे. यामुळे नागरिकांना दुपारच्या वेळी घराबाहेर पडणे टाळण्याचा सल्ला देण्यात आला आहे. पाचोरा नगरपालिका प्रशासनाने नागरिकांना सतर्क राहण्याचे आवाहन केले आहे. मुख्याधिकारी मंगेश देवरे यांच्याशी मधुर खान्देशचे संपादक राहुल महाजन यांनी संपर्क केला असता त्यांनी प्रतिक्रिया देताना सांगितले की, “उष्णतेच्या या लाटेत नागरिकांनी शक्यतो दुपारी बाहेर जाणे टाळावे. विशेषतः वयोवृद्ध आणि लहान मुलांची काळजी घ्यावी. पुरेसे पाणी प्यावे आणि सावलीत राहण्याचा प्रयत्न करावा.” नागरिकांना नियमित पाणी पिण्याचा सल्ला दिला आहे. त्याचबरोबर उष्माघातापासून बचावासाठी हलके कपडे घालावेत आणि थेट सूर्यप्रकाशात जाणे टाळावे अशा सूचना प्रशासनाने दिल्या आहेत. पाचोरा नगरपालिका प्रशासन नागरिकांच्या सुरक्षेसाठी सतर्क असून, आवश्यक ती सर्व खबरदारी घेण्याचे आवाहन करत आहे.
