पाचोऱ्यातील किशोर पेंढारकर यांची कन्या डॉ. स्नेहल रावतेंच्या दुर्दैवी अपघातात निधन! बाहेरपुरा परिसरात हळहळ व्यक्त
मधुर खान्देश वृत्तसेवा | पाचोरा, दि. १७ जून २०२५: पाचोरा शहरातील प्रसिद्ध सिमेंट सप्लायर किशोर पेंढारकर राहणार बाहेरपुरा पाचोरा यांची कन्या डॉ. स्नेहल प्रीतम रावते (डॉली) यांचे काल, १६ जून २०२५ रोजी रात्री भरधाव वाहनाच्या धडकेत झालेल्या अपघातात दुर्दैवी निधन झाले. या घटनेने संपूर्ण शहरात हळहळ व्यक्त होत असून, आज १७ जून रोजी दुपारी २ वाजता त्यांच्या राहत्या घरापासून बाहेरपुरा येथून अंत्ययात्रा निघणार आहे.
प्राथमिक मिळालेल्या माहितीनुसार, १६ जून रोजी डॉ.स्नेहल ह्या वडील किशोर पेंढारकर यांच्या सोबत जामनेर येथे पासपोर्टच्या संदर्भातील कागदपत्रे पोलिसांना देण्यासाठी गेले होती त्यानंतर कामे झाल्यावर परतीच्या प्रवासात रात्रीच्या सुमारास शेंदुर्णी ता.जामनेर जवळ स्नेहल रावते यांना भरधाव वेगाने येणाऱ्या वाहनाने चिरडल्याने हा भीषण अपघात घडला असून घटनास्थळी ग्रामस्थांनी तातडीने धाव घेतली होती. तसेच जवळच्या पोलिसांनीही त्वरित घटनास्थळी पोहोचून पंचनामा केला. दुर्दैवाने, स्नेहल यांचे वडील किशोर पेंढारकर यांच्यासमोरच ही घटना घडल्याने कुटुंबीयांचा आक्रोश ऐकून उपस्थितांचे डोळे पाणावले.
स्नेहल या पाचोऱ्यातील एका प्रतिष्ठित कुटुंबातील होत्या. त्यांच्या अकाली निधनाने परिसरात शोककळा पसरली आहे. या घटनेप्रकरणी पोलिस चौकशी करीत असल्याची माहिती मिळाली आहे.
