पाचोऱ्यातील विविध समस्यांबाबत नागरिकांनी घेतली मुख्याधिकाऱ्यांची भेट! तात्काळ कॉल अन् समस्या मार्गी
पाचोरा, दि. १७ जून २०२५: पाचोरा शहरातील विविध समस्यांबाबत आज स्थानिक नागरिकांनी नगरपालिकेच्या मुख्याधिकाऱ्यांची भेट घेऊन चर्चा केली. यावेळी पाचोरा-जामनेर रोडवरील नालीच्या पाण्यामुळे निर्माण होणारी दुर्गंधी आणि त्यामुळे नागरिकांना होणारा त्रास, कृष्णापुरी परिसरातील अपूर्ण मुतारीचे काम, तसेच अन्य प्रलंबित कामांबाबत सविस्तर चर्चा झाली.
पाचोरा-जामनेर रोडवर नालीचे पाणी रस्त्यावर येत असल्याने दुर्गंधी पसरत आहे, याकडे नागरिकांनी मुख्याधिकाऱ्यांचे लक्ष वेधले. तसेच, कृष्णापुरी नदीपासून भारत डेअरी बस स्टॉपपर्यंत असलेल्या दहा चेंबरांची उंची वाढवण्याची मागणी केली. याशिवाय, कृष्णापुरी भागातील मुतारीचे काम बऱ्याच दिवसांपासून अपूर्ण असल्याने होणाऱ्या दिरंगाईबाबत नाराजी व्यक्त करण्यात आली. देवी मंदिरामागे पडलेले उर्वरित मटेरियल तातडीने उचलण्याची विनंतीही यावेळी करण्यात आली.
या भेटीवेळी शरद गिते, विनोद पाटील, संदीप मराठे यांच्यासह स्थानिक ग्रामस्थ उपस्थित होते. मुख्याधिकाऱ्यांनी सर्व समस्यांची दखल घेऊन लवकरात लवकर कारवाई करण्याचे आश्वासन दिले.
