पाचोऱ्यात महात्मा फुले जयंतीचा जल्लोष; आमदार किशोर पाटील यांची अध्यक्षपदी एकमताने निवड
पाचोरा, दि. ६ एप्रिल २०२५ – येथे महात्मा ज्योतिबा फुले यांची जयंती ११ एप्रिल २०२५ रोजी मोठ्या उत्साहात आणि जल्लोषात साजरी होणार आहे. सार्वजनिक जयंती उत्सव समिती (पाचोरा) यांच्या बैठकीत सर्वानुमते ठरल्याप्रमाणे, विद्यमान आमदार यांना अध्यक्षपद देण्याचा निर्णय एकमताने घेण्यात आला. त्यानुसार आमदार किशोर आप्पा पाटील यांची अध्यक्षपदी निवड करण्यात आली आहे. ही निवड सर्व सामाजिक बहुजन संघटनांच्या वतीने करण्यात आली असून, त्यांचे सर्व बहुजन संघटनांतर्फे हार्दिक अभिनंदन करण्यात आले आहे.
यामध्ये कार्यक्रमाची रूपरेषा ठरविण्यात आली असून सकाळी स्मारकाजवळ पुष्पहार अर्पण करून महात्मा फुले यांना अभिवादन केले जाईल. संध्याकाळी मिरवणूक आयोजित करण्यात आली असून, ती कृष्णापुरी येथून निघेल आणि जामनेर रोड, छत्रपती शिवाजी महाराज चौक मार्गे स्मारकापर्यंत जाऊन सांगता होईल.
या कार्यक्रमाला बहुजन समाजातील सर्व स्तरांतून मोठा प्रतिसाद मिळणार असल्याचे बहुजन संघटनांकडून मत व्यक्त करण्यात आले आहे. महात्मा ज्योतिबा फुले यांच्या विचारांचा जागर आणि सामाजिक समतेचा संदेश या निमित्ताने पाचोऱ्यात पोहोचवला जाणार असल्याचे आयोजकांच्या वतीने सांगण्यात आले आहे
