पाचोऱ्यात महिला दिनानिमित्त ‘तिच्या’ आरोग्यासाठी धाव; पंचरत्न प्रतिष्ठानची पहिली ‘महिला मॅरेथॉन’ उत्साहात
पाचोरा:महिलांच्या सुप्त कलागुणांना वाव देण्यासाठी आणि आरोग्याप्रति जनजागृती करण्यासाठी पंचरत्न प्रतिष्ठानतर्फे जागतिक महिला दिनाचे औचित्य साधून पाचोरा शहरात पहिल्यांदाच ‘महिला मॅरेथॉन’चे अत्यंत उत्साहात आयोजन करण्यात आले. स्वतःसाठी पळा हे ब्रीदवाक्य घेऊन आयोजित केलेल्या या स्पर्धेत पाचोऱ्यातील महिलांनी उस्फूर्त सहभाग नोंदवत ‘आरोग्यदायी’ महिला दिन साजरा केला. पाचोरा शहरात महिलांसाठी हक्काचे व्यासपीठ आणि विशेषतः धावण्यासारख्या व्यायामाबाबत फारशी जनजागृती नसल्याचे चित्र होते. हीच उणीव भरून काढण्यासाठी पंचरत्न प्रतिष्ठानने या अनोख्या उपक्रमाचे पाऊल उचलले. विशेष म्हणजे, या स्पर्धेसाठी अधिकृतरीत्या ८९ महिलांनी नोंदणी केली होती, परंतु प्रत्यक्ष स्पर्धेच्या वेळी महिलांचा उत्साह इतका दांडगा होता की सुमारे १५० महिला या मॅरेथॉनमध्ये सहभागी झाल्या. ही मॅरेथॉन स्पर्धा दोन वयोगटांत घेण्यात आली. स्पर्धेत सहभागी झालेल्या प्रत्येक महिलेचे कौतुक म्हणून प्रतिष्ठानतर्फे सर्वांना मेडल (पदक) देऊन सन्मानित करण्यात आले. दोन्ही गटांतील पहिल्या तीन विजेत्यांना आकर्षक बक्षिसे देऊन गौरवण्यात आले.
“पाचोऱ्यात महिलांच्या कलागुणांना वाव मिळावा आणि त्यांनी स्वतःच्या आरोग्यासाठी वेळ काढावा, हाच या मॅरेथॉनमागचा मुख्य उद्देश होता. ‘स्वतःसाठी पळा’ या हाकेला महिलांनी दिलेला प्रतिसाद पाहून हा उपक्रम यशस्वी झाल्याचे समाधान वाटते.”
— आयोजक, पंचरत्न प्रतिष्ठान
- पाचोरा शहरातील पहिलीच विशेष महिला मॅरेथॉन.
- १५० हून अधिक महिलांचा प्रत्यक्ष सहभाग.
- सहभागी प्रत्येक महिलेला पदक देऊन प्रोत्साहन.
- दोन गटांत प्रत्येकी ३ विजेत्यांना बक्षिसांचे वाटप.
या उपक्रमामुळे पाचोरा शहरात महिलांच्या आरोग्याबाबत एक नवी जाणीव निर्माण झाली असून, पंचरत्न प्रतिष्ठानच्या या ‘हटके’ उपक्रमाचे सर्वस्तरातून कौतुक होत आहे.
