पाचोऱ्याच्या आरोग्यसेवेला संघटित सेवाभावाची नवी दिशा; डॉक्टर्स असोसिएशनची नवनिर्वाचित कार्यकारिणी जाहीर
पाचोरा शहरातील व परिसरातील आरोग्यसेवेला अधिक सक्षम, लोकाभिमुख आणि संघटित रूप देण्यासाठी ‘पाचोरा डॉक्टर्स असोसिएशन’ची नवीन कार्यकारिणी नुकतीच जाहीर करण्यात आली आहे. या नव्या कार्यकारिणीच्या निवडीमुळे पाचोरा आणि परिसरातील वैद्यकीय सेवेला तसेच सामाजिक सेवाभावाला एक नवी दिशा मिळाली आहे. संस्थेच्या ध्येय-धोरणांनुसार वैद्यकीय क्षेत्रातील सर्वसमावेशक विकासासाठी तज्ज्ञ व अनुभवी डॉक्टरांची विविध पदांवर बिनविरोध निवड करण्यात आली आहे.
पाचोरा डॉक्टर्स असोसिएशनच्या नवनिर्वाचित कार्यकारिणीत चेअरमनपदी डॉ. नरेश गवांंदे, अध्यक्षपदी डॉ. विजय जाधव,उपाध्यक्षपदी डॉ. स्वप्निल पाटील व डॉ. राहुल काटकर, सचिवपदी डॉ. विशाल पाटील, सहसचिवपदी डॉ. सचिन पाटील, खजिनदारपदी डॉ. ऋषिकेश चौधरी तर प्रसिद्धी प्रमुखपदी डॉ. पृथ्वीराज राजपुत यांची बिनविरोध निवड करण्यात आली आहे.
नवीन कार्यकारिणीच्या माध्यमातून पाचोरा तालुक्यातील सर्वसामान्य आणि ग्रामीण भागातील रुग्णांपर्यंत दर्जेदार आरोग्य सुविधा पोहोचवण्याला मुख्य प्राधान्य दिले जाणार आहे. याशिवाय वेळोवेळी मोफत आरोग्य तपासणी, रक्तदान व जनजागृती शिबिरांचे आयोजन करणे, आरोग्य सेवेतील पारदर्शकता वाढवून रुग्ण-डॉक्टर संवाद दृढ करणे आणि शासकीय आरोग्य विभागासोबत समन्वय साधून तातडीच्या प्रसंगी जलद सेवा पुरवणे, यांसारख्या विविध उपक्रमांवर भर दिला जाईल.
डॉक्टर्स असोसिएशनच्या या नवनिर्वाचित कार्यकारिणीचे पाचोरा शहरातील विविध सामाजिक, राजकीय आणि वैद्यकीय क्षेत्रातील मान्यवरांकडून जोरदार स्वागत व अभिनंदन करण्यात येत आहे. ही नवीन कार्यकारिणी आगामी काळात पाचोरा परिसरातील आरोग्य सेवा अधिक व्यापक आणि प्रभावी करेल, असा ठाम विश्वास उपस्थितांनी व्यक्त केला असून सर्व पाचोरा-भडगाव’ यांच्या वतीने नवनियुक्त पदाधिकाऱ्यांना पुढील वाटचालीसाठी मनःपूर्वक शुभेच्छा देण्यात आल्या आहेत.
