पाचोऱ्यात १६ जुलैपासून ‘पूज्य चालीहा साहेब’ उत्सवाला भक्तिमय वातावरणात प्रारंभ; विविध धार्मिक व सांस्कृतिक कार्यक्रमांचे आयोजन
पाचोरा:सिंधी समाजाच्या अथांग श्रद्धेचे आणि आस्थेचे प्रतीक असलेला ४० दिवसांचा पवित्र व्रत-उत्सव ‘पूज्य चालीहा साहेब’ यंदा गुरुवार, दिनांक १६ जुलै २०२६ पासून मोठ्या उत्साहात व भक्तिभावाने सुरू होत आहे. सिंधी समाजाचे इष्टदेव तथा वरुणदेव अवतार भगवान श्री झूलेलाल यांच्या विधीवत पूजन, आराधना आणि आशीर्वादाने या पवित्र व्रताची सुरुवात होणार आहे. पाचोरा येथील सिंधी कॉलनीतील श्री झूलेलाल मंदिर आणि ‘माँ का दरबार’ येथे हे मुख्य पूजन संपन्न होईल.
या चाळीस दिवसांच्या पवित्र कालावधीत सिंधी समाजासह इतर सर्व समाजातील भाविकही अत्यंत श्रद्धेने व्रत, उपवास, पूजा-अर्चना आणि विविध धार्मिक कार्यक्रमांमध्ये सहभागी होतात. सिंधी समाजाच्या सांस्कृतिक, धार्मिक व आध्यात्मिक परंपरेशी अतिशय घट्ट नाते असलेला हा उत्सव पाचोरा शहरात अनेक वर्षांपासून अखंडपणे व पारंपरिक पद्धतीने साजरा केला जात आहे.
दरवर्षीप्रमाणे यंदाही ‘पूज्य सिंधी जनरल पंचायत, पाचोरा’ आणि ‘चालिया ग्रुप’ यांच्या संयुक्त विद्यमाने या महोत्सवाचे नेटके नियोजन, व्यवस्थापन व विविध धार्मिक-सांस्कृतिक कार्यक्रमांचे आयोजन करण्यात आले आहे. या पवित्र महोत्सवादरम्यान श्री वसणघोट दरबार (उल्हासनगर) येथील पूज्य साई ओमीरामजी, पूज्य साई काली साईजी तसेच चाकरभाटा (छत्तीसगड) येथील पूज्य साई लालदासजी महाराज यांच्यासह सिंधी समाजातील थोर संत-महंतांची पावन उपस्थिती लाभणार आहे. संतांच्या उपस्थितीत दररोज सत्संग, भजन-कीर्तन आणि आध्यात्मिक प्रवचनांचे सुश्राव्य आयोजन केले जाईल.
नव्या पिढीमध्ये सिंधी संस्कृतीबद्दल अभिमान, श्रद्धा आणि आपुलकी निर्माण व्हावी, या उद्देशाने चालिया ग्रुपतर्फे लहान मुलांसाठी विविध सांस्कृतिक स्पर्धा, धार्मिक उपक्रम आणि कला सादरीकरणांचे विशेष आयोजन करण्यात आले आहे. या उपक्रमांमुळे सिंधी संस्कृती, परंपरा आणि सिंधी भाषेचे जतन व संवर्धन होण्यास मोठी मदत होणार आहे. या ४० दिवसांच्या उत्सवाची सांगता शेवटच्या दिवशी निघणाऱ्या भव्य ‘पूज्य बहराणा साहेब’ मिरवणुकीने आणि महाआरतीने होईल. उत्सवातील सर्व धार्मिक विधी व कार्यक्रम श्री झूलेलाल मंदिर, सिंधी कॉलनी, पाचोरा येथे संपन्न होणार आहेत. या सर्व धार्मिक व सांस्कृतिक कार्यक्रमांचा लाभ घेण्यासाठी आणि भगवान श्री झूलेलाल यांच्या दर्शनासाठी समस्त भाविकांनी मोठ्या संख्येने उपस्थित राहावे, असे आवाहन पूज्य सिंधी जनरल पंचायत, पाचोरा यांच्या वतीने करण्यात आले आहे.
