आरोग्य मित्र नितीन तायडेच्या रक्तदानामुळे वयोवृद्ध आजीला मिळाले जीवदान; अकराव्यांदा केले रक्तदान!
पाचोरा:तालुक्यातील सामाजिक कार्यकर्ते आणि आरोग्य मित्र नितीन तायडे यांनी पुन्हा एकदा आपल्या सामाजिक बांधिलकीचे दर्शन घडवले आहे. सामनेर येथील एका वयोवृद्ध आजींची प्रकृती खालावल्यामुळे त्यांना रक्ताची अत्यंत तातडीची गरज भासत होती. मात्र, संबंधित रक्तगट तात्काळ कुठेही उपलब्ध होत नसल्याने आजींच्या जीवाला धोका निर्माण झाला होता.
ही गंभीर परिस्थिती समजताच आरोग्य मित्र नितीन तायडे यांनी कोणतीही दिरंगाई न करता स्वतः रक्तदान करण्याचा निर्णय घेतला. त्यांनी तातडीने रुग्णालयात पोहोचून त्या वयोवृद्ध महिलेला रक्त दिले आणि त्यांचे प्राण वाचवले. विशेष म्हणजे, नितीन तायडे यांनी यापूर्वी १० वेळा रक्तदान केले असून, हे त्यांचे ११ वे रक्तदान होते. त्यांच्या या ऐनवेळच्या मदतीमुळे आजींना नवे जीवदान मिळाले आहे.
सदर वयोवृद्ध महिला पाचोरा शहरातील अजय सिंग परदेशी यांच्या ‘होम क्रिटिकल केअर हॉस्पिटल’मध्ये उपचारासाठी दाखल होत्या. नितीन तायडे यांनी दाखवलेल्या या तत्परतेबद्दल आणि मानवतावादी भूमिकेबद्दल रुग्णालय प्रशासनासह आजींच्या कुटुंबीयांनी आणि संपूर्ण पाचोरा तालुक्यातून त्यांचे भरभरून कौतुक होत आहे.
