तुम्ही नगरपरिषदेचा कर भरला का? नसेल तर ही बातमी तुमच्यासाठी असू शकते….पाचोरा नगरपरिषदेने केले गाळे सील!
पाचोरा नगरपरिषदेमार्फत शहरातील मालमत्ताधारक, दुकानधारक, गाळेधारक यांच्याकडून थकीत असलेल्या मालमत्ता कराची व पाणीपट्टी कराची वसुली सुरू असून जिल्हाधिकारी जळगाव यांच्या निर्देशानुसार थकबाकीदार मालमत्ताधारकांवर व पाणीपट्टी धारकांवर नळ कनेक्शनची तोडणी करणे तसेच मालमत्ता सील करण्याची कार्यवाही सुरू आहे. त्याअंतर्गत पाचोरा नगरपरिषदेने ६ पथके तयार केलेली असून, पाचोरा शहरात सदर पथकांमार्फत थकीत कराची वसुली मोहीम सूरु आहे. त्यानुसार नगरपरिषद पथकामार्फत आज दिनांक २६/०३/२०२५ रोजी शहरातील भडगाव रोड पेट्रोल पंपासमोरील ४ गाळे व कृष्णापुरी भागातील जळगाव रोड वरील २ गाळे असे एकूण ६ गाळे मालमत्ता कराची रक्कम थकविल्यामुळे सील करण्यात आली. नगरपरिषदे मार्फत सदर थकीत मालमत्ताधारकांना जप्तीच्या नोटिसा देण्यात आलेल्या असून, कर्मचारी यांनी सदर मालमत्ताधारकांना वेळोवेळी भेट देऊन सुद्धा कराची मागणी करून ही सदर मालमत्ताधारकांनी थकीत असलेल्या कराची रक्कम नगरपरिषदेस अदा केली नव्हती. त्यामुळे मुख्याधिकारी श्री मंगेश देवरे यांच्या नियंत्रणाखाली कर अधिक्षक डी. एस. मराठे, व वसुली पथकातील अधिकारी व कर्मचारी यांनी दिनांक २६/०३/२०२५ रोजी वरील ठिकाणी असलेल्या एकूण ६ गाळे सील केले. जप्ती, सीलिंग व नळ कनेक्शन तोडणीची कारवाई सुरू असून, आजपावेतो एकूण ५९ नळ कनेक्शनची तोडणी करण्यात आलेले आहे. तसेच सदरची कारवाई ही दररोज करण्यात येणार आहे. थकीत मालमत्ताकरांवर शासन नियमाप्रमाणे प्रति माह २% शास्ती आकारणी सुरू असून, शास्तीची तसेच जप्ती व सिलिंगची कारवाई टाळावयाची असल्यास नागरिकांनी आपापल्या थकीत मालमत्ता कर, पाणीपट्टी कर व इतर अनुषंगिक कराच्या रक्कमा तात्काळ नगरपरिषदेच्या कार्यालयात जमा कराव्यात व आपल्यावर होणारी कटू कारवाई टाळावी असे आवाहन मुख्याधिकारी श्री मंगेश देवरे यांनी केले.
