जळगावात राज्य उत्पादन शुल्क विभागाचा मोठा दणका; १५१५ लिटर गावठी दारू जप्त!
जळगाव: आगामी महानगरपालिका निवडणुकीच्या पार्श्वभूमीवर शहरात अवैध दारू विक्री विरोधात राज्य उत्पादन शुल्क विभागाने मोठी कारवाई केली आहे. रेल्वे स्थानक आणि शिवाजीनगर परिसरासह इतरही घातलेल्या छाप्यात तब्बल १५१५ लिटर गावठी हातभट्टीची दारू जप्त करण्यात आली असून, सुमारे दोन लाख रुपयांचा मुद्देमाल हस्तगत करण्यात आला आहे. महानगरपालिका निवडणुकीच्या काळात अवैध मद्याचा पुरवठा होण्याची शक्यता वर्तवण्यात येत आहे. याच अनुषंगाने राज्य उत्पादन शुल्क विभागाचे अधीक्षक डॉ. व्ही. टी. भूकन यांना रेल्वे स्थानक आणि शिवाजीनगर भागात गावठी दारूची विक्री होत असल्याची गुप्त माहिती मिळाली होती. या माहितीच्या आधारे पथकाने सोमवारी (१२ जानेवारी) दुपारी नियोजनबद्ध रित्या ही कारवाई केली. या छाप्यात किरण सीताराम सोनवणे व विवेक विजय ढाके या दोन आरोपींना रंगेहात पकडण्यात आले आहे. त्यांच्याकडे मोठ्या प्रमाणात गावठी दारूचा साठा आढळून आला. या प्रकरणी दोन्ही संशयितांविरुद्ध गुन्हा दाखल करण्यात आला असून, पोलीस आणि उत्पादन शुल्क विभाग अधिक तपास करत आहेत.ही कारवाई अधीक्षक डॉ. व्ही. टी. भूकन यांच्या मार्गदर्शनाखाली निरीक्षक डी. एम. चकोर, एस. एम. मोरे,दुय्यम निरीक्षक जी. डी. अहिरे, ए. डी. पाटील,कर्मचारी पी. पी. तायडे, आर. डी. जंजाळे, धनसिंग पावरा यांच्या मदतीने करण्यात आली आहे. शहर आणि परिसरात अशाच प्रकारे इतर ठिकाणीही छापे टाकण्यात आले असून, अवैध धंदे करणाऱ्यांचे धाबे दणाणले आहेत. निवडणुकीच्या काळात अशा कारवाया अधिक तीव्र केल्या जातील, असा इशारा प्रशासनाने दिला आहे.
