पाचोरा पोलिसांची कारवाई! काही तासांतच दोन चोरीचे गुन्हे उघड, मुद्देमालासह आरोपी पोलिसांच्या ताब्यात
पाचोरा (प्रतिनिधी):पाचोरा शहर आणि परिसरात वाढत्या चोरीच्या घटनांच्या पार्श्वभूमीवर पाचोरा पोलिसांनी कौतुकास्पद कामगिरी केली आहे. केवळ तीन तासांच्या अवधीत चोरीचे दोन मोठे गुन्हे उघडकीस आणून पोलिसांनी आरोपीला अटक केली आहे. या कारवाईत चोरीला गेलेले तीन एअर कंडिशनर्स (AC) आणि सोन्याची पोत असा एकूण १ लाख २४ हजार ५०० रुपयांचा मुद्देमाल हस्तगत करण्यात आला आहे. पोलिसांच्या या वेगवान तपासचक्रांमुळे गुन्हेगारांचे धाबे दणाणले असून नागरिकांमधून समाधान व्यक्त होत आहे. मिळालेल्या माहितीनुसार, अक्सा नगर (जारगाव) येथील एका गोदामातून ९४ हजार ५०० रुपये किमतीचे ‘गोदरेज’ कंपनीचे तीन एसी चोरीला गेले होते. याप्रकरणी पोलीस स्टेशनला गुन्हा रजि. नं. १७७/२०२६ नुसार गुन्हा दाखल होताच पोलीस निरीक्षक राहुलकुमार पवार यांनी तपासाची चक्रे फिरवली. गोपनीय माहितीच्या आधारे रिहान हमीश शहा (वय २२, रा. हनुमान नगर, पाचोरा) याला ताब्यात घेऊन विचारपूस केली असता, त्याने गुन्ह्याची कबुली दिली. त्याच्याकडून एसीसह अन्य एका गुन्ह्यातील (रजि. नं. १७४/२०२६) ३० हजार रुपये किमतीची सोन्याची पोत देखील जप्त करण्यात आली आहे. या धडक कारवाईत पोलीस पथकातील विलास पाटील, वसीम शेख, श्रीकांत गायकवाड, योगेश पाटील, संदीप राजपूत आणि गणेश कुंवर यांनी महत्त्वाची भूमिका बजावली.
