कल्याणकारी योजनांसाठी बांधकाम कामगारांची नोंदणी आवश्यक- मुख्याधिकारी मंगेश देवरे! बांधकाम व्यवसायिक संजय कुमावत यांचा सत्कार
पाचोरा येथे क्रेडाईच्या वतीने आयोजित बांधकाम कामगारांच्या विशेष कार्यक्रमात बोलताना पाचोरा नगर परिषदेचे मुख्याधिकारी मंगेश देवरे यांनी कामगारांना अधिकृत नोंदणीचे महत्त्व पटवून दिले. “शासकीय योजनांचे लाभ, घर बांधणीसाठी अनुदान, मुलांचे शिक्षण आणि विमा संरक्षण मिळवण्यासाठी कामगारांनी आपली नोंदणी करून घेणे अनिवार्य आहे,” असे प्रतिपादन त्यांनी केले. क्रेडाई महाराष्ट्रद्वारे राज्यात साजरा होत असलेल्या ‘कृतज्ञता सप्ताहा’चे औचित्य साधून व्यापारी भवन येथे कामगारांची आरोग्य तपासणी व आर्थिक साक्षरता मार्गदर्शन शिबिर उत्साहात पार पडले. या कार्यक्रमाचे उद्घाटन मुख्याधिकारी देवरे यांच्या हस्ते दीपप्रज्वलन व श्री विश्वकर्मा पूजनाने झाले. यावेळी व्यासपीठावर क्रेडाई पाचोराचे संस्थापक अध्यक्ष संजय कुमावत यांच्यासह विविध क्षेत्रांतील मान्यवर उपस्थित होते.
कार्यक्रमादरम्यान मान्यवरांचा सत्कार करण्यात आला, ज्यामध्ये संजय कुमावत यांची क्रेडाई महाराष्ट्र व महाराष्ट्र जीवन प्राधिकरणामध्ये महत्त्वपूर्ण पदी नियुक्ती झाल्याबद्दल विशेष गौरव करण्यात आला. आपल्या अध्यक्षीय भाषणात मुख्याधिकारी देवरे यांनी पाचोरा शहरातील लक्ष्मी कन्स्ट्रक्शनने उभारलेल्या राजीव गांधी टाऊन हॉलसारख्या उत्कृष्ट प्रकल्पांचा गौरवपूर्ण उल्लेख केला. त्यांनी स्पष्ट केले की, शासनाच्या विविध कल्याणकारी योजनांचा लाभ घेण्यासाठी कामगारांनी सलग तीन वर्षे नोंदणी करणे तांत्रिकदृष्ट्या आवश्यक आहे. प्रास्ताविकात सचिन बाहेती यांनी क्रेडाईच्या उपक्रमांची माहिती दिली, तर लक्ष्मी कन्स्ट्रक्शनचे संचालक संजय कुमावत यांनी कामगारांना कामाच्या ठिकाणी सुरक्षा साधनांचा वापर करून स्वतःचा बचाव करण्याचे आवाहन प्रभावी शैलीत केले.
या शिबिरातून सुमारे ३०० कामगारांनी आरोग्य तपासणीचा लाभ घेतला, तर १४५ नवीन कामगारांची अधिकृत नोंदणी करण्यात आली. प्रमुख वक्ते सीए प्रशांत अग्रवाल यांनी कामगारांना बचतीचे महत्त्व आणि मजुरीचा विनियोग कसा करावा, यावर आर्थिक साक्षरतेचे मोलाचे धडे दिले. कार्यक्रमात उपस्थित कामगारांना ‘सेफ्टी किट’चे वाटप करण्यात आले व ते वापरण्याचे तांत्रिक प्रशिक्षणही देण्यात आले. स्वराज नेत्रालय आणि विघ्नहर्ता मल्टी स्पेशालिटी हॉस्पिटलच्या डॉक्टरांनी कामगारांची आरोग्य तपासणी केली. हा कार्यक्रम यशस्वी करण्यासाठी क्रेडाई पाचोराच्या पदाधिकाऱ्यांनी व सदस्यांनी विशेष परिश्रम घेतले. कार्यक्रमाचे सूत्रसंचालन प्राचार्य डॉ. शिवाजी शिंदे यांनी केले आहे.
