Advertisements

पाचोरा:”पोलीस म्हणजे केवळ कडक शिस्त आणि कायदा नव्हे, तर संकटसमयी धावून येणारा खरा बंधू असतो,” याचाच प्रत्यय पाचोरा येथे आला आहे. पाचोरा पोलीस ठाण्यातील पोलीस अंमलदार शरद पाटील यांच्या अतुलनीय सतर्कतेमुळे आणि चातुर्यामुळे एका १७ वर्षीय तरुणाला मरणाच्या दारातून सुखरूप परत आणण्यात यश आले आहे. पोलिसांच्या या तत्परतेमुळे एका वृद्ध माता-पित्याचा एकुलता एक आधार वाचला असून, परिसरातून खाकी वर्दीवर कौतुकाचा वर्षाव होत आहे.

काय घडली घटना?

नाशिक जिल्ह्यातील सिन्नर येथील सुमित विजय घुलवे (वय १७) हा तरुण काही वैयक्तिक कामानिमित्त पाचोरा पोलीस ठाण्याच्या हद्दीत आला होता. प्रचंड मानसिक ताणतणावात असलेल्या सुमितने टोकाचे पाऊल उचलण्याचे ठरवले. त्याने आपल्या व्हाट्सअपवर (WhatsApp) “आपली जीवनयात्रा संपवत आहे” असा स्टेटस ठेवला. हा स्टेटस पाहताच त्याच्या कुटुंबीयांच्या पायाखालची जमीनच सरकली. त्यांनी तात्काळ नाशिक पोलिसांशी संपर्क साधून मदत मागितली.

क्षणाचाही विलंब न करता शोधमोहीम

नाशिक पोलिसांनी सुमितचा मोबाईल ट्रॅक केला असता, त्याचे लोकेशन जळगाव जिल्ह्यातील पाचोरा पोलीस ठाण्याच्या हद्दीत दाखवले. नाशिक पोलिसांच्या माहितीवरून पाचोरा पोलीस तात्काळ ॲक्शन मोडमध्ये आले. पोलीस कर्मचारी शरद मांगो पाटील यांनी क्षणाचाही विलंब न करता तांत्रिक मदतीने अचूक लोकेशन शोधले. हे लोकेशन ‘मित्रा टाईप’ जवळील महादेव मंदिराच्या रेल्वे ट्रॅकजवळचे असल्याचे निष्पन्न झाले.

…आणि सुमितचे प्राण वाचले!

पोलीस कर्मचारी शरद पाटील यांनी तातडीने रेल्वे ट्रॅकच्या दिशेने धाव घेतली. तिथे सुमित रेल्वेसमोर उडी घेण्याच्या तयारीतच होता. शरद पाटील यांनी अतिशय संयमाने आणि चातुर्याने सुमितशी संवाद साधला, त्याचे समुपदेशन केले आणि त्याला आत्महत्येच्या प्रयत्नापासून परावृत्त करून सुरक्षितपणे ताब्यात घेतले. त्याला पाचोरा पोलीस ठाण्यात आणून धीर देण्यात आला आणि त्याच्या पालकांना सुखरूप स्वाधीन करण्यात आले.

“पोलीस खात्याची मान उंचावली!”
या धाडसी आणि कौतुकास्पद कामगिरीबद्दल पाचोरा पोलीस ठाण्याचे पोलीस निरीक्षक राहुल कुमार यांनी शरद पाटील आणि त्यांना मदत करणारे संदीप पाटील यांचे विशेष कौतुक व अभिनंदन केले. “तुम्ही दाखवलेली तत्परता आणि खाकीतील माणुसकीमुळे आज एका आई-वडिलांचा वृद्धत्वाचा आधार वाचला आहे. तुमच्या या कामगिरीमुळे संपूर्ण पोलीस खात्याची मान उंचावली आहे,” अशा शब्दांत पोलीस निरीक्षकांनी त्यांच्या पाठीवर कौतुकाची थाप दिली.

समाजात पोलिसांबद्दल कृतज्ञतेची भावना

अनेकदा पोलिसांच्या कामगिरीकडे संशयाने किंवा नकारात्मकतेने पाहिले जाते. मात्र, शरद पाटील यांनी दाखवलेली तत्परता ही ‘खाकी वर्दीतील माणुसकीचे’ उत्तम उदाहरण आहे. केवळ एका पोलीस कर्मचाऱ्याच्या सतर्कतेमुळे एका कोवळ्या जिवाला नवजीवन मिळाले असून, सुमितच्या पालकांनी अश्रूपूर्ण नयनांनी पाचोरा पोलिसांचे आभार मानले आहेत.