पाचोऱ्यातील डॉक्टर सागर गरुड व विघ्नहर्ता हॉस्पिटलच्या टीमकडून माणुसकीचे दर्शन; ७९ वर्षीय निराधार आजीबाईंवर मोफत शस्त्रक्रिया करून दिले जीवनदान
पाचोरा: आजकालच्या धावपळीच्या आणि धकाधकीच्या युगात माणुसकी हरवत चालल्याची ओरड नेहमीच ऐकायला मिळते. मात्र, पाचोरा शहरात घडलेल्या एका घटनेने समाजात आजही संवेदनशील आणि सेवाभावी व्यक्ती अस्तित्वात असल्याचे सिद्ध केले आहे. शहरातील ७९ वर्षीय वयोवृद्ध आणि निराधार आजीबाई तेजाबाई भिमराव पाटील यांच्या हाताला एका अज्ञात वाहनाने धडक दिल्याने त्या गंभीर जखमी झाल्या होत्या. कोणतेही नातेवाईक पाठीशी नसलेल्या या आजीबाईंना एका दयाळू रिक्षाचालकाने तात्काळ येथील ‘विघ्नहर्ता मल्टीस्पेशालिटी हॉस्पिटल’मध्ये दाखल केले आणि तो आपल्या कामावर निघून गेला.
आजीबाईंच्या हाताला जबर दुखापत झाली असल्याने त्यांच्यावर तातडीने उपचार करणे आवश्यक होते. परिस्थितीचे गांभीर्य ओळखून विघ्नहर्ता हॉस्पिटलचे संचालक डॉ. सागर गरुड यांनी क्षणाचाही विलंब न लावता वैद्यकीय उपचारांना सुरुवात केली. आजीबाईंकडे उपचारासाठी एक रुपयाही नव्हता, फक्त एक ओळखपत्र होते. परंतु, पैशांपेक्षा प्राणाची आणि आरोग्याची किंमत मोठी मानत डॉ. सागर गरुड आणि त्यांच्या वैद्यकीय टीमने आजीबाईंच्या हाताचे कठीण ऑपरेशन पूर्णपणे मोफत केले. एवढेच नव्हे तर उपचारादरम्यान लागणारा औषधोपचार आणि इतर सर्व खर्चही डॉक्टरांनी स्वतःच्या खिशातून केला. उपचार पूर्ण झाल्यानंतर आज, २१ जुलै २०२६ रोजी आजीबाईंना पूर्णपणे बरे वाटल्याने रुग्णालयातून सुखरूप डिस्चार्ज देण्यात आला. आजीबाईंना कोणीही जवळचे नातेवाईक नसल्याने त्या पाचोरा शहरातील एका भागात एकट्याच राहतात; ही बाब लक्षात घेऊन डॉ. सागर गरुड यांनी त्यांना घरी पाठवताना तात्पुरती प्राथमिक आर्थिक व वैद्यकीय मदतही सुपूर्द केली. कोणतीही अपेक्षा न ठेवता अत्यंत आपुलकीने आणि तत्परतेने एका निराधार वृद्धापकाळातील आजीबाईंवर मोफत उपचार करून डॉ. सागर गरुड व त्यांच्या टीमने माणुसकीचा अनोखा आदर्श निर्माण केला आहे. या सेवाभावी आणि कौतुकास्पद कार्याबद्दल डॉ. सागर गरुड यांच्यावर संपूर्ण परिसरातून अभिनंदनाचा व कौतुकाचा वर्षाव होत आहे.
