मांग गारुडी समाजाच्या विविध मागण्यांसाठी १७ ऑगस्ट रोजी पाचोरा तहसीलदार कार्यालयासमोर आमरण उपोषण
पाचोरा / नगरदेवळा:
नगरदेवळा (ता. पाचोरा, जि. जळगाव) येथील सकल मांग गारुडी समाजाच्या विविध प्रलंबित विकासात्मक मागण्यांकडे प्रशासनाचे लक्ष वेधण्यासाठी येत्या १७ ऑगस्ट २०२६ रोजी पाचोरा येथील तहसीलदार कार्यालयासमोर आमरण उपोषण करण्यात येणार आहे.
सकल मांग गारुडी समाजाचे अध्यक्ष सुरेश नाना राखपसरे (नगरदेवळा) आणि त्यांच्या सहकारी कार्यकर्त्यांच्या शिष्टमंडळाने दिनांक १० ऑगस्ट २०२६ रोजी पाचोरा तहसीलदार, प्रांत कार्यालय, स्थानिक पोलीस प्रशासन तसेच ग्रामपंचायत नगरदेवळा यांना याबाबतचे सविस्तर निवेदन दिले आहे. प्रशासनाने मागण्यांची त्वरित दखल न घेतल्यास १७ ऑगस्टपासून तीव्र उपोषण छेडण्याचा इशारा या पत्राद्वारे देण्यात आला आहे.
या आंदोलनाच्या पार्श्वभूमीवर, समाजाच्या न्याय्य हक्कांसाठी आणि विकासासाठी संपूर्ण महाराष्ट्रातील मांग गारुडी समाजबांधवांनी एकत्र येण्याचे आवाहन करण्यात आले आहे.
“आपसातील सर्व मतभेद, श्रेयवाद आणि हेवेदावे बाजूला ठेवून, पाचोरा, जळगाव जिल्ह्यासह संपूर्ण महाराष्ट्रातील समाजनेते, समाजसेवक आणि समाजबांधवांनी १७ ऑगस्ट रोजी सकाळी पाचोरा तहसीलदार कार्यालयासमोर मोठ्या संख्येने उपस्थित राहावे. उपोषणकर्त्या पाठीशी खंबीरपणे उभे राहून समाजाच्या मनोबलात वाढ करावी आणि या आंदोलनाला जाहीर पाठिंबा द्यावा.”
— शाहीर वाल्मीक फाजगे (खेडगावकर), समाज हितचिंतक
